Azərbaycanda daha bir yol ödənişli oldu

Tarif Şurası alternativ avtomobil yolu ilə gediş üçün ödəniş məbləğlərini müəyyən edib.

Xeberal.com xəbər verir ki, bu barədə Tarif Şurası məlumat yayıb.

Qurum xatırladıb ki, işğaldan azad olunmuş ərazilərdə aparılan genişmiqyaslı bərpa və yenidənqurma işləri çərçivəsində bölgənin sosial-iqtisadi inkişafı, turizm potensialından istifadənin və strateji əhəmiyyətli ərazilər arasında nəqliyyat əlaqəsinin genişləndirilməsi məqsədilə alternativ olaraq Əhmədbəyli-Füzuli-Şuşa avtomobil yolu tikilib.

Nazirlər Kabinetinin 1 aprel 2026-cı il tarixli qərarı ilə bu yol ödənişli yol kimi müəyyən olunub. Qanunvericiliyə əsasən, keyfiyyəti dövlət standartlarının tələblərinə cavab verən ödənişsiz avtomobil yolu mövcud olduqda alternativ ödənişli avtomobil yolları yaradıla bilər və bu yoldan istifadə seçimdən asılıdır.

Azərbaycan Avtomobil Yolları Dövlət Agentliyi Əhmədbəyli-Füzuli-Şuşa avtomobil yolu ilə gediş üçün ödəniş məbləğlərinin təsdiq edilməsi ilə bağlı Şuraya müraciət edilib və bu gün bu məsələyə baxılıb.

Nəqliyyat vasitələrinin alternativ avtomobil yolu ilə gedişi üçün ödənişin məbləği ƏDV ilə birgə minik avtomobilləri və kütləsi 3.5 tona qədər olan yük avtonəqliyyat vasitələri üzrə 1 km üçün 8,6 qəpik (bütün yol üçün 6.99 manat) müəyyən edilib. Kütləsi 3.5 tondan yuxarı olan yük avtonəqliyyat vasitələri və digər maşın-mexanizmlər üzrə ödənişin məbləği 1 km üçün 10,6 qəpik (bütün yol üçün təxminən 8.62 manat) təşkil edəcək. Avtobuslar üzrə bu yolun 1 km-i üçün ödənişin məbləği 7,1 qəpik (bütün yol üçün 5.77 manat), qoşqulu və yarımqoşqulu, o cümlədən 3 və daha çox oxlu nəqliyyat vasitələrinin ödənişli yoldan istifadəsi üçün qiymət 1 km-ə 17.7 qəpik (bütün yol üçün 14.39 manat) müəyyənləşdirilib.

Əhmədbəyli-Füzuli-Şuşa avtomobil yolu ənənəvi yoldan 19.7 km qısa olmaqla, sürət həddi daha yüksəkdir. Məsafənin qısa və sürət həddinin yüksək olması istifadəçilərə vaxtla yanaşı, yanacağa da qənaət etməyə imkan verəcəkdir.

İclasda həmçinin avtomobil yolunun 1 km ödənişli hissəsi üzrə motosiklet nəqliyyat vasitələrinin gedişi üçün ödənişin məbləği Əhmədbəyli-Füzuli-Şuşa avtomobil yolu üzrə 4.65 qəpik, M-1 Bakı-Quba-Rusiya ilə dövlət sərhədi avtomobil yolu üzrə isə 5 qəpik müəyyən olunması qərara alınıb.

Bu ödənişlərdən daxil olan vəsait təsdiq edilən bölgü əsasında ödənişli avtomagistralların və müvafiq ödəniş məntəqələrinin, habelə respublika və yerli əhəmiyyətli avtomobil yollarının saxlanılması, qorunması və təmiri, ödənişli avtomagistralların idarə olunması, avtomobil yollarının layihələndirilməsi, yenidən qurulması və tikintisi ilə bağlı xərclərin maliyyələşdirilməsi məqsədilə istifadə olunur.

Qərar sabahdan qüvvəyə minəcək.

Vüsal Nəsirli ona vəzifə verdi

Azərbaycan Avtomobil Yolları Dövlət Agentliyində yeni təyinat olub.

Xeberal.com unikal.az-a istinadən xəbər verir ki, bununla bağlı AAYDA-nın İdarə Heyətinin sədri Vüsal Nəsirli əmr imzalayıb.

Əmrə əsasən, Babayev Həsən Namiq oğlu qurumun Maliyyə və İqtisadiyyat şöbəsinin müdir müavini təyin edilib.

Qeyd edək ki, H.Babayev bundan əvvəl Dövlət Tibbi-Sosial Ekspertiza və Reabilitasiya Agentliyinin Maliyyə departamentinin Maliyyə Nəzarəti və Hesabatlılıq şöbəsinin müdiri olub.

Jurnalistlər üçün çay plantasiyasına mediatur təşkil olunub - FOTO

“Azərsun Holdinq”in təşkilatçılığı ilə Beynəlxalq çay günü ilə əlaqədar jurnalistlər üçün Masallıya mediatur təşkil olunub. Görüş çərçivəsində media nümayəndələri “Azerçay”ın çay plantasiyalarına baş çəkərək ilin ilk çay yığımı prosesi ilə yaxından tanış olublar.

Xeberal.com xəbər verir ki, səfər zamanı jurnalistlərə yerli çayçılığın inkişafı istiqamətində görülən işlər, plantasiyalarda tətbiq olunan aqrotexniki üsullarla bağlı məlumat verilib.

“Sun Tea” çay fabrikinin direktoru Nuriyyə Rəhmanova yağış mövsümünün məhsuldarlığa müsbət təsir etdiyini qeyd edib: “Bugün etibarı ilə bağlarda çay yığımı başlayıb. Bu il məhsuldarlığın daha yaxşı olacağını gözləyirik. Keçən ilə nisbətən təxminən 10-12% artım müşahidə olunacaq”.

İdari işlər üzrə məsul şəxs Altay Abbasov ilin ilk yığımının başladığını və 22 minə yaxın şitil əkildiyini bildirib: “Keçən illə müqayisədə bu il əkin sahələrimiz də artıb, bununla əlaqədar məhsulun bol olacağını düşünürük”.

Qeyd edək ki, “Azerçay” məhsulları yerli bazarla yanaşı dünyanın 40-dan çox ölkəsinə ixrac olunur. “Made in Azerbaijan” markasını daşıyan məhsullar beynəlxalq sərgilərdə uğurla təmsil edilir və Azərbaycan çayçılıq ənənələrinin dünyada tanıdılmasına töhfə verir.

Məşhur iş adamına ağır itki - FOTO

Azərbaycanda tanınmış iş adamına ağır itki üz verib.

Xeberal.com un məlumatına görə, “Körpü-Bina-Tikinti” MMC-nin sədri Xəlil Göyüşovun anası Pəri xanım vəfat edib.

Mərhumun ölüm səbəbi açıqlanmayıb.

Allah rəhmət eləsin.

Regionların inkişafına töhfə verən rəhbər – Zamin Abbasov və rəhbərlik etdiyi qurumun fəaliyyəti diqqət mərkəzində

Zamin Abbasov rəhbərlik etdiyi Beyləqan Yol İnşaat Servis MMC vasitəsilə bölgələrdə həyata keçirilən yol və infrastruktur layihələri ilə diqqət çəkən rəhbərlər sırasında göstərilir. Son illər aparılan abadlıq-quruculuq işləri, kəndlərarası yolların yenilənməsi və nəqliyyat infrastrukturunun yaxşılaşdırılması istiqamətində görülən işlər bölgə sakinləri tərəfindən müsbət qarşılanır.

Məlumata görə, rəhbərlik etdiyi kollektivdə operativlik, keyfiyyət və məsuliyyət prinsiplərinə xüsusi önəm verilir. Həyata keçirilən layihələr zamanı müasir standartların tətbiqi və vətəndaş məmnunluğunun ön planda saxlanılması əsas məqsədlərdən biri kimi göstərilir.

Qeyd edilir ki, Zamin Abbasov iş prosesində həm peşəkar idarəçilik, həm də kollektivlə sağlam münasibət qurması ilə seçilir. Yol təsərrüfatının inkişafına yönələn layihələr bölgələrin sosial-iqtisadi inkişafına da öz töhfəsini verir.

Bu gün ölkədə həyata keçirilən genişmiqyaslı infrastruktur layihələri çərçivəsində bölgələrdə görülən işlər dövlət siyasətinin əsas prioritet istiqamətlərindən biri hesab olunur. Bu prosesdə məsuliyyətli və işinə ciddi yanaşan rəhbərlərin fəaliyyəti xüsusi diqqət çəkir.

Xeberal.com

"Böyük Qayıdış mənzil sektoruna təzyiqi azaldır" - Mikayıl Cabbarov

"Azərbaycanda 2020-ci ildən sonrakı dövr əsasən Böyük Qayıdış Proqramı ilə xarakterizə olunur və 30 ildən artıq müddətdə məcburi köçkün həyatı yaşamış minlərlə insanın doğma torpaqlarına qayıtması mənzil sektoruna təzyiqi azaldır".

Xeberal.com xəbər verir ki, bu fikirləri İqtisadiyyat naziri Mikayıl Cabbarov Bakıda keçirilən XIII Dünya Şəhərsalma Forumunun (WUF13) növbəti günündə “Qeyri-rəsmi yaşayış məntəqələrinin və gecəqonduların transformasiyası: dünya üçün mənzil təminatı” mövzusunda keçirilən dialoq sessiyasında deyib.

Mikayıl Cabbarov bildirib ki, Azərbaycanın bu sahədə əsas dərsi problemin əvvəlcə rəsmi şəkildə tanınması, daha sonra siyasi, sosial və iqtisadi amillər nəzərə alınmaqla həll modelinin hazırlanması olub.

O qeyd edib ki, uğurlu nəticə əldə etmək üçün yerli icmaların dəstəyi, hökumətin siyasi iradəsi və özəl sektorun iştirakı ilə işlək iqtisadi modelin qurulması vacibdir.

Nazir əlavə edib ki, son illərdə çoxmənzilli yaşayış binalarının istismara qəbul prosedurları sadələşdirilib və əsas şəhərsalma tələblərinə cavab verən bəzi qeyri-rəsmi tikililər üçün amnistiya mexanizmləri tətbiq olunub.

"Qanunsuz tikililərin leqallaşdırılması ehtiyatla aparılmalıdır. Çünki sadə amnistiya qısamüddətli sosial problemləri həll etsə də, gələcəkdə kənd təsərrüfatı torpaqlarına, meşə sahələrinə, su ehtiyatlarına və kritik infrastruktur zonalarına təzyiqi artıra bilər".

Hamlet Musayevin qızı həbsdən azad edildi

Ədliyyə Nazirliyinin Məhkəmə Ekspertiza Mərkəzinin sabiq rəis müavini Hamlet Musayevin yarım milyondan çox dələduzluqda ittiham edilən qızı həbsdən azad edilib.

Xeberal.com Qafqazinfo-ya istinadən xəbər verir ki, bu barədə müvafiq qərar qəbul edilib.

M.Musayeva 610 min manat pulunu ələ keçirdiyi Ü.Quliyeva ilə barışıq əldə edib. O, külli miqdarda məbləği hissə-hissə ödəməyə razılaşıb.

Tərəflər arasında razılıq əldə edildiyindən istintaq orqanı həbsin davamına ehtiyac görməyib. M.Musayeva polis nəzarəti şərti ilə təcridxanadan azad edilib.

Zərərçəkmiş şəxsin hüquqlarını tanınmış vəkil Ceyhun Yusifov müdafiə edir. Amma vəkil müvəkkili ilə təqsirləndirilən şəxsin barışması və dəymiş ziyandan nə qədər ödənilməsi ilə bağlı sualımıza cavab verməkdən imtina etdi.

Qeyd edək ki, M.Musayeva bir neçə ay əvvəl həbs edilib. O, sanksiyasında 14 ilə kimi həbs nəzərdə tutulan xüsusilə külli miqdarda dələduzluq maddəsi ilə ittiham edilir.

Qatarların iş qrafiki elan olundu - Sərhəd açılır

"Azərbaycan Dəmir Yolları" QSC (ADY) və "Gürcüstan Dəmir Yolları" SC arasında əldə olunmuş ilkin razılaşmaya əsasən, qatarlar hər gün Bakıdan saat 23:10-da yola düşəcək və növbəti gün saat 08:41-də Tblisiyə çatacaq, Tbilisidən isə saat 21:00-da yola düşməklə növbəti gün Bakıya saat 06:24-də çatacaq.

Bu barədə Xeberal.com-a ADY-dən məlumat verilib.

Bakı–Tbilisi–Bakı marşrutu üzrə qatarlara Azərbaycan ərazisində Bakı Dəmiryol Vağzalı, Biləcəri, Yevlax, Gəncə, Ağstafa və Böyük Kəsik stansiyalarında, Gürcüstan ərazisində isə Qardabani stansiyası və Tbilisi Dəmiryol Vağzalında dayanacaq veriləcək.

İctimaiyyətə əlavə məlumat təqdim ediləcək.

Yanan otel onun imiş - FOTO

Novxanıda “AF Hotel & Aqua Park” kompleksində yerləşən hoteldə yanğın baş verib.

Xeberal.com Unikal.az-a istinadən xəbər verir ki, hotel “AF Holdinq Şirkətlər Qrupu”nun sahibi, iş adamı Azay Möhnətova məxsusdur.

A.Möhnətov, eyni zamanda “EuroHome” tikinti materialları, “Uğur-97” şirkətlərinin də sahibidir.

Xatırladaq ki, 2020-ci ildə “EuroHome” tikinti materialları bazarında da güclü yanğın hadisəsi olmuşdu.

Pensiyaların ödənişi bu tarixdə yekunlaşacaq

Bugün pensiyaların ödənilməsi yekunlaşdırılacaq.

Bu barədə Xeberal.com-a Dövlət Sosial Müdafiə Fondundan məlumat verilib.

Bildirilib ki, mayın 20-də respublika üzrə pensiyaların tam ödənilərək yekunlaşdırılması nəzərdə tutulub.

Həmin gün güzəştli şərtlərlə pensiya hüququna malik şəxslərin də pensiyaları ödəniləcək.